كيف اتقرب من الله

ـ #كيف_اتقرب_من_ربنـا ؟؟

سؤال عميق لو كل واحد قعد برااه كدا وسأل نفسوا السؤال دا حيكتشف انوا محتاج يعمل حاجات كتيييييره بل ويتخلص منها اول قبل يجاوب 👇🏻

الصلاة والصيام والذكاة وغيرها من الفروض دي حاجه واجبه عليك تمام وممكن تعملها بس برضوا ما تقربك لـ ربنا .. كييف ؟

انت ك شاب في البيت ما محترم امك وابوك برسلوك ما بتمشي وتقعد تجوط وتنفض في ايدك ومعديها صعوض وسجائر وشيشه .. وبعد دا عايز تتقرب من ربنا كيف وريني ؟؟

انت ك شاب طول اليوم بتتسكع مع اصحابك في الشوارع والمنتزهات وبتشاغلو البنات الداخله والطالعه وتعلقوا علي لبسهم وبرضو عايزين القرب من ربنا ؟؟

وانتي ك شابه ماسكه تلفونك كانوا ولدك وما فضل ليك الا ترضعيه وتبقي امو رسمي .. وما بتساعدي امك في البيت وقاتله اختك الصغيره بالشغل ..

قاعده جوه غرفتة وتتكلمي في التلفون " ايو حبيبي معاك انا ! بس ناس البيت مزعجين حبه معليش روحي 🙄 " .. حتقربي من ربنا كيف وانتي علاقتك مع امك ذي الطين وصوتك بعلا لدرجة يصل اخر الشارع وفي نفس الوقت بتتكلمي مع واحد غريب عنك ' اجنبي ' بكل احترام عكس كلامك مع امك ! وعايزه تقربي من ربنا صح ؟؟

..
ربنا دا ما قريب واحد فينا دا الرحمن الرحيم الذي ليس كمثله شيء كويس ! يلا عشان نقرب منو بحق وحقيقه نعمل الاتي :

ـ ما نصلي صلاة من الصلوات كواجب علينا ولازم نعملوا لا .. نصلي بيقين وطمأنينه ونستشعر عظمة الله .. لانو وانت في الصلاة اذا فكرت في حاجه دنيويه او حبيبك 😒 يبقي صلاتك حتكون ناقصه دا لو ما بطلت 👍🏻

وعلاقتنا مع الوالد والوالده لازم تكون ميه في الميه .. نسمع كلامهم بدون حجه ونخنخة كلام .. ما نرفع صوتنا في وشهم .. نخليهم اقرب لينا من كل زول .. نحكي ليهم اسرارنا ومشاكلنا لانهم الامان وماف حاجه بتتسهل من غير رضاهم عننا ❤️

وعلاقتنا مع جيرانا لازم تكون سليمه بدون مشاكل وقطيعة ونميمه .. وصلة الرحم دي الاهم لانو اذا عندك اهلك مقاطعهم وما بتمشي تسلم عليهم يبقي ما تعشم في الجنه وحتتعكس عليك برا وجوه 💔 .. ف شنو ابقي احسن منهم وصالحهم واسال الله خيرهم 👍

..
لازم نبعد عن الخلوه مع الغريب .. يعني انتي كبنت تبعدي تماما عن الاحتكاك مع ولد بحجة انو زميل دراسه وشنو ما عارف .. والهظار والضحك واللبع في الكتف ! وارح فطرني الليله عليك .. وصاحبتي عيانه ارح ونسني لحدي ما احصل .. وقول لي كلمتين حلوات يا بيبي .. 👉🏻 الكلام دا لو ما اتخلصتي منو ما حتقدري تقربي من ربنا مهما حاولتي ✋🏻

والله ربنا غفور رحيم وبابوا مفتووح ف عشان كدا خلونا نتخلص من عاداتنا الكعبه وما نرتكب الاخطاء الممكن تبعدنا عنو سبحانه 😔

وربنا يهديني واياكم للطريق المستقييم 🙂