.... خرمجة المساء .....
من بعد غياب جيناكم و قد ارسلنا لكم الشوق ......
ﻳَﺎ ﺃَﻳُّﻬَﺎ ﺍﻟَّﺬِﻳﻦَ ﺁَﻣَﻨُﻮﺍ ﺇِﻥْ ﺟَﺎﺀَﻛُﻢْ ﻓَﺎﺳِﻖٌ ﺑِﻨَﺒَﺄٍ ﻓَﺘَﺒَﻴَّﻨُﻮﺍ ﺃَﻥْ ﺗُﺼِﻴﺒُﻮﺍ ﻗَﻮْﻣﺎً ﺑِﺠَﻬَﺎﻟَﺔٍ ﻓَﺘُﺼْﺒِﺤُﻮﺍ ﻋَﻠَﻰ ﻣَﺎ ﻓَﻌَﻠْﺘُﻢْ ﻧَﺎﺩِﻣِﻴﻦَ﴾ .
في الايام السابقة المتابع لاحداث الاعلام المسيطرة على الشاشة و مواقع التواصل الاجتماعي كما نعلم " تجارة الاعضاء / الخطف / و اختفاء اديبة " و ظهر الحق
لكن من المؤسف خاض الناس في الإفك و هلك من هلك دون تقصي لآخبار و لولا رحمة الله علينا و لطفه لتزعزع الناس و انتشرت الفوضي ....
لكن ليبقي السؤال واضحا من هو وراء الإشاعات ؟؟؟؟؟
هل هي كالعادة " مؤامرات خارجية و مخطط خارجي و كاروهات داخلي """
ام نحن من تعودنا ان تشيع الإشاعة في مجتمعنا بقصد او بغير قصد ....
ايضا امس الاول انتشرت صورة لبائعة متجولة و ادعي ناشرون انها تحمل شهادة " ماستر " في اللغة الإنجليزية قسم الاداب جامعة الخرطوم " و من طلاب أ.د / عبدالله الطيب ...
تمام اها قلنا صح هي عندها ماستر لغة انجليزية اداب جامعة الخرطوم و قراها البروفسور عبدالله الطيب يعني شنو !؟؟
دا ما كفيل بي اننا نبقيها قضية راي عام و طوالى نجري ننبذ الحكومة و نقول الحكومة هي السبب و الاسطوانات المتكررة دي ......
اي زول شاف المنشور دا طوالى يقول ليك دي بتتكلم انجليزي بي طلاقة و ما لقت فرصة شغل اتعينت و ما عارف ايش اسع شغالة تبيع فشار .....
ليش بي الزات فشار ما كان تبيع سمك او شاي حاجة تانية تشغل عقلية الماستر و العلوم الشالتها من بروفسور عبدالله الطيب في حاجة تنفعا دا اذا قلنا الحكومة هي السبب و ما لقت فرصة عمل ما طوالى تمش تبيع تسالي في شارع النيل و تتكلم انجليزي لي الناس تقول ليهم انا خريجة اداب و شنو ما عارف .....
و الناس الصوروها و شغالين يروجوا الموضوع اها اسع نحنا نستفيد شنو من صورة خريجة اداب بتبيع تسالي و لا شنو ما عارف؟؟؟!!!
... مش عشان نجي نقول الحكومة ما شغلت الناس !!!!
ياخ ما الناس دي كلها تعرف من زمان الحكومة ما شغلت الناس و الحكومة هي المطلعة زيت الناس و الحكومة و الحكومة الشعارات النمطية السلبية عن النظام و لا يخلوا منها اي نظام حكم في العالم .....
انا الشي البعرفوا إنو سنوات الجامعة في زمنها داك او سنوات الجامعة عموما قد تكون كفيلة بي انها تمرقك زول يقدر يخطط لي مستقبلو بي طريقة قد تكاد تكون ترضيهو .....
فمثلا انك خريج انجليزي و زول " شفت و عندك ماستر " ياخ ما طوالي تمشي تسوي تسالي و تمشي شارع النيل توري الناس شهاداتك كل الناس عندها شهدات و ما شغالة الجديد شنو ؟؟؟
الرزق بيد الله لكن تسعي ربنا يساعدك .....
جرب شوف مجالك قول ما بقيت مترجم او حاجة قريبة من الشي البتحلم بيهو في اطار التخصص ياخ في مليون معهد و مدرسة خاصة ممكن تستوعبك مدرس " محترم "
او تكون بتاع استقبال في اي مصلحة غير حكومية ... اخير من تبيع تسالي و تجي توري الناس عضلات انجليزيك ....
#خلاصة القول اي زول اتخرج من جامعة يقدر يتخذ قرارات ايجابية لي مستقبلوا الوظيفي و ان كان خارج اطار التخصص دا اذا كان انسان " سليم العقل و التفكير "
#لكن موضوع تقول لي زول يتخرج اداب انجليزي و يجي يبيع تسالي و فشار دا الا زول بكون " عندو مشكلة نفسية او مشاكل اخري "
# انا اؤمن تماما ان وراء هذه البائعة سر و قد تكون مشكلة نفسية او مشاكل اخري فهذه الظاهرة غير طبيعية اطلاقا ..... يجب ان تدرس بدلا من اصدار احكام ز تصريحات قد تكون بعيدة عن القضية الاساسية .....
فنحن بدل من تصديق الاخبار " مقفولة " و نسلم بها و نحلل بسطحية يجب ان ندرسها المشكلة جيدا و نحكم من بعد ذلك .....
نسأل الله ان يجنبنا شر الفتن ما ظهر منها و ما بطن و ان يصلح حالنا و احوالنا انه ولي ذلك و القادر عليه .....
# يوسف محمد على
2/8/2017
0 التعليقات